కడప మున్సిపల్ ఎన్నికలు: 3 వేల మంది పోలీసులతో పటిష్ట బందోబస్తు

కడప, పులివెందుల ప్రాంతాల్లో అదనపు బలగాలతో బందోబస్తు నిర్వహిస్తున్నారు. కడప నగరంలో మొత్తం 361 పోలింగ్ కేంద్రాలను ఏర్పాటు చేయగా, వీటిలో 16 అత్యంత సమస్యాత్మక కేంద్రాలుగా, 42 సమస్యాత్మక కేంద్రాలుగా గుర్తించారు. ఈ కేంద్రాల వద్ద ప్రత్యేక నిఘా ఏర్పాటు చేశారు.

కడప నగరంలోనే వెయ్యి మందికి పైగా పోలీసులతో భద్రత కల్పిస్తున్నారు. జిల్లా వ్యాప్తంగా మొత్తం 3 వేల మంది సిబ్బందిని విధుల్లో నియమించారు. ఎటువంటి అవాంఛనీయ ఘటనలు జరగకుండా ముందస్తు చర్యలు చేపట్టారు.

ముఖ్యమంత్రి ఓటుపై నిబంధనలు

పులివెందులలో ఓటు వేసేందుకు ముఖ్యమంత్రి వైఎస్ జగన్కు అనుమతి ఇచ్చినట్లు డీఐజీ తెలిపారు. అయితే, ఓటు వేసిన వెంటనే ఇంటికి వెళ్లాలని స్పష్టం చేశారు. పోలింగ్ కేంద్రాల వద్ద గుమిగూడరాదని, అల్లర్లకు పాల్పడితే కఠిన చర్యలు తప్పవని హెచ్చరించారు.

ఎన్నికలు ప్రశాంతంగా నిర్వహించేందుకు అన్ని ఏర్పాట్లు పూర్తి చేశామని డీఐజీ కోయ ప్రవీణ్ తెలిపారు.