కడప జిల్లాలో మున్సిపల్ ఎన్నికలకు సర్వం సిద్ధం: కలెక్టర్ డా. శ్రీధర్ చెరుకూరి

శనివారం కడప ఆర్ట్స్ కళాశాల ప్రాంగణంలో ఏర్పాటు చేసిన పోలింగ్ సామగ్రి డిస్ట్రిబ్యూషన్ కేంద్రాన్ని, పులివెందుల జేఎన్టీయూ క్యాంపస్ లో ఏర్పాటు చేసిన డిస్ట్రిబ్యూషన్ కేంద్రాన్ని జిల్లా కలెక్టర్, జిల్లా ఎన్నికల అధికారి డా. శ్రీధర్ చెరుకూరి పరిశీలించారు. అక్కడి సౌకర్యాలు, సదుపాయాలపై పోలింగ్ సిబ్బందిని అడిగి తెలుసుకుని సంబంధిత అధికారులకు పలు సూచనలిచ్చారు. పోలింగ్ సామగ్రి పంపిణీ ప్రక్రియ సజావుగా సాగుతోందని, పోలింగ్ ప్రక్రియ కూడా ప్రశాంత వాతావరణంలో సాగేలా అన్ని ఏర్పాట్లు సిద్ధం చేశామని కలెక్టర్ ఈ సందర్భంగా తెలిపారు.

భద్రతా ఏర్పాట్లు

గత నామినేషన్ల సమయంలో జరిగిన ఘటనలను దృష్టిలో ఉంచుకుని కడప, పులివెందుల, జమ్మలమడుగు ప్రాంతాల్లో ప్రత్యేక భద్రతా చర్యలు చేపట్టినట్లు కలెక్టర్ తెలిపారు. ఎలాంటి అవాంఛనీయ ఘటనలు జరగకుండా ముందస్తు జాగ్రత్తలు తీసుకున్నామని, అవసరమైన ప్రాంతాల్లో అదనపు పోలీసు బలగాలను కూడా సిద్ధంగా ఉంచామన్నారు. సమస్యాత్మక, అత్యంత సమస్యాత్మక పోలింగ్ కేంద్రాలను ముందుగానే గుర్తించి ప్రత్యేక నిఘా ఏర్పాటు చేశామని, వెబ్కాస్టింగ్ ద్వారా పోలింగ్ ప్రక్రియను పూర్తిస్థాయిలో పర్యవేక్షించడంతో పాటు సీసీ కెమెరాలను ఏర్పాటు చేశామన్నారు. పోలింగ్ కేంద్రాల్లో పరిస్థితులను నిశితంగా గమనించేందుకు 208 మంది సూక్ష్మ పరిశీలకులను నియమించామన్నారు.

వాహనాల ఏర్పాటు

పోలింగ్ సిబ్బంది, ఎన్నికల సామగ్రి తరలింపునకు 62 మార్గాలను ఖరారు చేసి 169 వాహనాలను ఏర్పాటు చేశామని, వీటిలో 67 ఆర్టీసీ బస్సులు, 92 చిన్న బస్సులు, 10 టూఫాన్ వాహనాలు ఉన్నాయని తెలిపారు. ప్రతి మార్గానికి ప్రత్యేక అధికారులను నియమించి ప్రయాణాన్ని పర్యవేక్షించేలా చర్యలు తీసుకున్నారు. బ్యాలెట్ పెట్టెలు, ఎన్నికల సామగ్రిని పోలీసు భద్రత మధ్య ప్రత్యేక వాహనాల్లో తరలించారు. అభ్యర్థులు, వారి ప్రతినిధులకు ఈ వాహనాల్లో ప్రయాణించేందుకు అనుమతి లేదు. ఎన్నికల విధులకు కేటాయించిన వాహనాలను ఇతర అవసరాలకు వినియోగించకుండా చర్యలు చేపట్టారు.

ఎన్నికలు ప్రశాంతంగా, స్వేచ్ఛగా, నిష్పక్షపాతంగా జరిగేలా అన్ని శాఖల అధికారులు సమన్వయంతో పనిచేస్తున్నారని, ఓటర్లు ఎలాంటి భయం లేకుండా తమ ఓటు హక్కును వినియోగించుకోవాలని జిల్లా ఎన్నికల అధికారి, కలెక్టర్ డా. శ్రీధర్ చెరుకూరి తెలిపారు. బద్వేలు, జమ్మలమడుగు, కడప, మైదుకూరు, పులివెందుల, రాజంపేట, ఎర్రగుంట్లలో ఏడు పంపిణీ కేంద్రాలను ఏర్పాటు చేశారు. ఈ కేంద్రాల నుంచే పోలింగ్ అధికారులకు, సహాయ పోలింగ్ అధికారులకు ఎన్నికల సామగ్రిని అందజేశారు. సామగ్రిని సరిచూసుకున్న అనంతరం ప్రత్యేక వాహనాల్లో పోలీసు భద్రత మధ్య సంబంధిత పోలింగ్ కేంద్రాలకు పంపించారు. పోలింగ్ సిబ్బంది సాయంత్రం 5.30 నుంచి 6 గంటలలోపు తమకు కేటాయించిన కేంద్రాలకు చేరుకునేలా ఏర్పాట్లు చేశారు.