నెలలు నిండకముందే జన్మించిన శిశువుల సంరక్షణలో వైద్య సాంకేతికత కొత్త పుంతలు తొక్కుతోంది. తల్లిదండ్రుల ఒడిలోనే శిశువులను సంరక్షించేందుకు వీలు కల్పించే స్కిన్క్యుబేటర్ అనే వినూత్న పరికరం అమెరికాలో ప్రయోగాత్మకంగా అందుబాటులోకి వచ్చింది. ఇది నెలలు నిండని శిశువులకు కొత్త ఆశను రేకెత్తిస్తోంది.
సాధారణంగా నెలలు నిండకముందే పుట్టిన శిశువుల శరీర ఉష్ణోగ్రతను కాపాడేందుకు, శ్వాసకు అవసరమైన సహాయం అందించేందుకు ప్రత్యేక ఇంక్యుబేటర్లలో ఉంచుతారు. అయితే ఈ సమయంలో తల్లిదండ్రులు తమ బిడ్డలను దగ్గరకు తీసుకుని హత్తుకునే అవకాశం కొన్నిసార్లు ఆలస్యమవుతుంది. ఈ సమస్యను తగ్గించేందుకు రూపొందించిన వినూత్న పరికరమే స్కిన్క్యుబేటర్. దీనిపై అమెరికాకు చెందిన సీఎన్ఎన్ న ప్రత్యేక కథనాన్ని ప్రసారం చేసింది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
స్కిన్క్యుబేటర్ అంటే ఏమిటి
స్కిన్క్యుబేటర్ అనేది నెలలు నిండకముందే పుట్టిన శిశువులను తల్లిదండ్రుల ఛాతీపై సురక్షితంగా ఉంచి, చర్మస్పర్శ ద్వారా సంరక్షణ అందించేందుకు రూపొందించిన వైద్య పరికరం. సాధారణ ఇంక్యుబేటర్లో ఉండే శిశువును తల్లిదండ్రుల ఒడిలోకి తీసుకురావడం కష్టమైన సందర్భాల్లో ఇది సహాయపడుతుంది. ఈ పరికరంలో శిశువును సురక్షితంగా ఉంచేందుకు ప్రత్యేక ఆధారం, పారదర్శక కవచం ఉంటాయి. శిశువుకు అమర్చిన శ్వాస గొట్టాలు, వైద్య పరికరాల అనుసంధానాలు కదలకుండా జాగ్రత్తలు తీసుకుంటారు.
