పిల్లల్లో చక్కెర వినియోగం శరీరంలో కొవ్వు పేరుకుపోవడంపై ప్రభావం చూపుతుందని తాజా అధ్యయనం వెల్లడించింది. అయితే ఈ ప్రభావం పిల్లల లింగం, చక్కెర తీసుకునే వయసును బట్టి మారుతున్నట్లు పరిశోధకులు గుర్తించారు. ముఖ్యంగా గర్భధారణ సమయంలో తల్లి తీసుకునే అదనపు చక్కెరలు ఆడపిల్లల్లో శరీర కొవ్వుతో బలమైన సంబంధం కలిగి ఉండగా, శిశు దశలో పిల్లలు తీసుకునే చక్కెరలు మగపిల్లల్లో కొవ్వు పెరుగుదలతో ఎక్కువ సంబంధం చూపినట్లు అధ్యయనం పేర్కొంది.
అధ్యయనం వివరాలు
అమెరికాలోని యూనివర్సిటీ ఆఫ్ కాన్సాస్ మెడికల్ సెంటర్ పరిశోధకులు ఈ అధ్యయనాన్ని నిర్వహించారు. మొత్తం 130 మంది తల్లులు, వారి పిల్లలకు సంబంధించిన ఆహారపు అలవాట్లు, శరీర నిర్మాణ వివరాలను విశ్లేషించారు. గర్భధారణ నుంచి పిల్లలకు రెండేళ్లు వచ్చే వరకు, అంటే జీవితంలోని తొలి 1,000 రోజుల పోషకాహారంపై పరిశోధకులు దృష్టి సారించారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఈ పరిశోధనలో 65 మంది బాలురు, 65 మంది బాలికలు పాల్గొన్నారు. గర్భధారణ సమయంలో 12 నుంచి 20 వారాల మధ్య తల్లుల ఆహార వివరాలను సేకరించారు. పిల్లలకు రెండు వారాలు, ఆరు నెలలు, 12 నెలలు, 24 నెలల వయసులో ఆహారపు అలవాట్లకు సంబంధించిన వివరాలను నమోదు చేశారు. రెండేళ్ల వయసులో పిల్లల నడుము చుట్టుకొలత, చర్మం కింద కొవ్వు మందం వంటి అంశాలను పరిశీలించారు. వీరిలో 42 మంది పిల్లలకు మాత్రమే శరీర కొవ్వు, కండరాలు తదితర అంశాలను గుర్తించే ప్రత్యేక స్కానింగ్ వివరాలు అందుబాటులో ఉన్నాయి.
