జమ్మూ కశ్మీర్లో అధికార నేషనల్ కాన్ఫరెన్స్ () పార్టీలో అంతర్గత అసమ్మతి రాజకీయంగా చర్చనీయాంశమైంది. ఇటీవల మంత్రివర్గ విస్తరణపై అసంతృప్తి వ్యక్తం చేసిన పలువురు ఎమ్మెల్యేలు పార్టీ అధ్యక్షుడు ఫారూఖ్ అబ్దుల్లా, ముఖ్యమంత్రి ఒమర్ అబ్దుల్లాతో సమావేశమయ్యారు. అనంతరం పార్టీలో చీలిక వచ్చే అవకాశాలపై వస్తున్న వార్తలను ఫారూఖ్ అబ్దుల్లా తోసిపుచ్చారు.
ఇటీవల జరిగిన మంత్రివర్గ విస్తరణలో తమకు తగిన ప్రాధాన్యం ఇవ్వలేదని నేషనల్ కాన్ఫరెన్స్కు చెందిన పలువురు ఎమ్మెల్యేలు అసంతృప్తి వ్యక్తం చేశారు. మొత్తం 41 మంది పార్టీ ఎమ్మెల్యేలలో కనీసం 18 మంది ప్రభుత్వ పనితీరు, నిర్ణయాలు తీసుకునే విధానం, తమ నియోజకవర్గాల సమస్యలపై నాయకత్వానికి అభ్యంతరాలు తెలియజేసినట్లు నివేదికలు వెల్లడించాయి. ముఖ్యమంత్రి ఒమర్ అబ్దుల్లా సలహాదారు నాసిర్ అస్లాం వానీని ఆ పదవి నుంచి తొలగించాలని, ఉప ముఖ్యమంత్రి సురీందర్ చౌదరికి కేటాయించిన ప్రజాపనుల శాఖ () బాధ్యతలను మార్చాలని అసంతృప్త ఎమ్మెల్యేలు డిమాండ్ చేసినట్లు సమాచారం.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
శ్రీనగర్లోని ఫారూఖ్ అబ్దుల్లా నివాసంలో దాదాపు రెండు గంటలపాటు ఈ సమావేశం జరిగింది. ఎమ్మెల్యేల అభ్యంతరాలను నాయకత్వం శ్రద్ధగా విన్నదని ఫారూఖ్ తెలిపారు. కొన్ని సమస్యలను వెంటనే పరిష్కరిస్తామని, మరికొన్నింటిపై దశలవారీగా నిర్ణయాలు తీసుకుంటామని హామీ ఇచ్చారు. సమావేశం అనంతరం అసంతృప్త ఎమ్మెల్యేలతో కలిసి మీడియా ముందుకు వచ్చిన ఆయన నేషనల్ కాన్ఫరెన్స్లో చీలిక వచ్చిందన్న ప్రచారాన్ని నిరాధారమని పేర్కొన్నారు. పార్టీ ఐక్యంగా ఉందని, దానిని ఎవరూ విడగొట్టలేరని స్పష్టం చేశారు.
