కాంగ్రెస్ అగ్రనేత రాహుల్ గాంధీపై చేసిన వ్యాఖ్యల నేపథ్యంలో తనపై పోలీసులు కేసు నమోదు చేయడాన్ని బీజేపీ నాయకురాలు, కేరళ మాజీ డీజీపీ ఆర్. శ్రీలేఖ తీవ్రంగా విమర్శించారు. ఈ వ్యవహారంలో ప్రభుత్వం ద్వంద్వ వైఖరి అవలంబిస్తోందని ఆమె ఆరోపించారు. ప్రధానమంత్రిపై విమర్శలు చేసినప్పుడు ఒకలా, రాహుల్పై వ్యాఖ్యలు చేసినప్పుడు మరోలా వ్యవహరిస్తున్నారని ఆమె తన సామాజిక మాధ్యమ పోస్టులో పేర్కొన్నారు.
కేరళలోని పునలూరులో బీజేపీ నిర్వహించిన నిరసన కార్యక్రమంలో పాల్గొన్న శ్రీలేఖ.. ఢిల్లీలో ప్రతిపక్షాలు చేపట్టిన ఆందోళనలపై మాట్లాడారు. ఆ సందర్భంగా రాహుల్ గాంధీ ప్రవర్తనను మత్తు పదార్థాలు తీసుకున్న వ్యక్తి ప్రవర్తనతో పోలుస్తూ వ్యాఖ్యలు చేశారు. నిరసనలను తాండవంగా అభివర్ణించడాన్ని కూడా ఆమె విమర్శించారు. ఈ వ్యాఖ్యలపై కాంగ్రెస్ నాయకులు అభ్యంతరం వ్యక్తం చేశారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
యూత్ కాంగ్రెస్ రాష్ట్ర ఉపాధ్యక్షుడు విష్ణు సునిల్ పంతళం ఈ వ్యాఖ్యలపై పోలీసులకు ఫిర్యాదు చేశారు. శ్రీలేఖ వ్యాఖ్యలు రెచ్చగొట్టే విధంగా ఉన్నాయని, మతపరమైన భావాలను కూడా దెబ్బతీశాయని ఫిర్యాదులో ఆరోపించినట్లు వార్తా కథనాలు తెలిపాయి.
