వైఎస్ఆర్ కడప జిల్లా కాశీనాయన మండలంలోని నాయనపల్లె రెవెన్యూ పరిధిలో దళితులు, పేదలు సాగు చేసుకుంటున్న ప్రభుత్వ భూములను ఆక్రమించుకున్న వారిపై కఠిన చర్యలు తీసుకుంటామని బద్వేల్ ఆర్డీఓ చంద్రమోహన్ హామీ ఇచ్చారు. కోర్టు పరిధిలో ఉన్న 8 ఎకరాలు మినహా మిగిలిన భూములను ప్రభుత్వం స్వాధీనం చేసుకుంటుందని ఆయన ప్రకటించారు.
శనివారం ఉదయం వ్యవసాయ కార్మిక సంఘం నాయకులు ఆర్డీఓ చంద్రమోహన్ను కలిసి వినతిపత్రం సమర్పించారు. ఈ నేపథ్యంలో ఆయన సానుకూలంగా స్పందిస్తూ, నాయనపల్లె రెవెన్యూ భూముల్లో దళితుల హక్కులను కాలరాసేలా ఎవరు వ్యవహరించినా సహించేది లేదని స్పష్టం చేశారు. కోర్టు స్టే ఉన్న 8 ఎకరాలను పక్కన పెట్టి, మిగిలిన వివాదాస్పద ప్రభుత్వ భూములన్నింటినీ రెవెన్యూ శాఖ తన ఆధీనంలోకి తీసుకుంటుందని, నిబంధనలను అతిక్రమించి భూ ఆక్రమణలకు పాల్పడితే స్వయంగా క్షేత్రస్థాయికి వచ్చి కఠినమైన చర్యలు తీసుకుంటామని, ఆయా భూముల్లో ప్రభుత్వ బోర్డులను నాటుతామని ఆర్డీఓ చంద్రమోహన్ తెలిపారు.
తాజా వార్తలు, అప్డేట్స్ అన్నీ మీ దగ్గర!
రోజువారీ వార్తలు మీ ఇన్బాక్స్కి పొందండి
అనంతరం, వ్యవసాయ కార్మిక సంఘం నాయకులు ఆర్డీఓ కార్యాలయం వద్ద నిరసన తెలిపారు. కాశీనాయన మండల పరిధిలోని నాయనపల్లె రెవెన్యూ పొలంలోని సర్వే నెంబర్లు 129, 130, 217లలో ఉన్న వందలాది ఎకరాల ప్రభుత్వ భూములను 2018 సంవత్సరం నుండి వరికుంట, నాయనపల్లె గ్రామాలకు చెందిన పేదలు, దళితులు సాగు చేసుకుంటున్నారని వారు వివరించారు. గత వైసీపీ ప్రభుత్వ హయాంలో స్థానిక రెవెన్యూ అధికారులను ప్రలోభాలకు గురిచేసి, రాజకీయ పలుకుబడితో, అగ్రవర్ణాలకు చెందిన కొందరు వైసీపీ నాయకులు ఈ భూములను దౌర్జన్యంగా ఆక్రమించుకున్నారని వారు ఆరోపించారు. గత ఐదు రోజులుగా వ్యవసాయ కార్మిక సంఘం ఆధ్వర్యంలో పేదలు తమ భూముల్లోకి వెళ్తుండగా, గ్రామీణ ధనిక పెత్తందారులు వారిపై భౌతిక దాడులకు తెగబడుతున్నారని నాయకులు ఆగ్రహం వ్యక్తం చేశారు.
