జిల్లాలో ఎంపీటీసీ, జెడ్పీటీసీ ఎన్నికలకు పటిష్ట బందోబస్తు: ఎస్పీ ధీరజ్ కునుబిల్లి

ఎన్నికల నేపథ్యంలో సమస్యాత్మక వ్యక్తులపై ఇప్పటికే బైండోవర్లు పూర్తి చేశామని, శాంతిభద్రతలకు విఘాతం కలిగించే వారిపై ముందస్తు చర్యలు తీసుకున్నామని ఎస్పీ తెలిపారు. అత్యవసర పరిస్థితులను ఎదుర్కొనేందుకు ప్రత్యేకంగా మొబైల్ టీమ్స్, స్ట్రైకింగ్ ఫోర్స్, రిజర్వ్ బలగాలను సిద్ధంగా ఉంచామని పేర్కొన్నారు.

అక్రమాలపై ఉక్కుపాదం

ఎన్నికల్లో మద్యం, నగదు అక్రమ రవాణాను అరికట్టేందుకు జిల్లా వ్యాప్తంగా చెక్పోస్టులు ఏర్పాటు చేసి, ఫ్లయింగ్ స్క్వాడ్ బృందాలతో తనిఖీలు ముమ్మరం చేశామని ఎస్పీ వివరించారు. ఎన్నికల కోడ్ ఉల్లంఘించినా, ఓటర్లను ప్రలోభాలకు గురి చేసినా కఠిన చర్యలు తప్పవని హెచ్చరించారు.

ఓటర్లందరూ ఎలాంటి భయానికి, ప్రలోభాలకు లొంగకుండా నిర్భయంగా తమ ఓటు హక్కును వినియోగించుకోవాలని ఎస్పీ ధీరజ్ కునుబిల్లి పిలుపునిచ్చారు. ఎన్నికలకు సంబంధించిన ఏదైనా అత్యవసర సమాచారం, అక్రమాలు దృష్టికి వస్తే వెంటనే స్థానిక పోలీసులకు లేదా టోల్ ఫ్రీ నంబర్లు 100, 112 కు సమాచారం అందించాలని కోరారు.

ఎన్నికలు ప్రశాంతంగా, పారదర్శకంగా నిర్వహించేందుకు ప్రజలు సహకరించాలని ఎస్పీ విజ్ఞప్తి చేశారు.