ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ ఇండియా కూటమి ఎంపీలు చేపట్టిన నిరసన మంగళవారం ఉత్కంఠకు దారితీసింది. పార్లమెంట్ నుంచి ఎన్నికల సంఘం కార్యాలయం వైపు సాగిన మార్చ్ను పోలీసులు అడ్డుకోవడంతో పలువురు ప్రతిపక్ష నేతలను అదుపులోకి తీసుకున్నారు. ఈ సమయంలో కాంగ్రెస్ నేతలు రాహుల్ గాంధీ, ప్రియాంక గాంధీ వాద్రా అనూహ్యంగా ఆకాశవాణి భవన్లోకి వెళ్లడంతో పరిస్థితి మరో మలుపు తిరిగింది.
మధ్యాహ్నం నితి ఆయోగ్ సమీపంలో ఏర్పాటు చేసిన పోలీసు బారికేడ్లపైకి ఎక్కి రాహుల్ గాంధీ జాతీయ జెండాను ప్రదర్శించారు. అనంతరం పోలీసులు రోడ్డుపై కూర్చున్న ఎంపీలను అదుపులోకి తీసుకోవడం ప్రారంభించారు. రాహుల్ కూడా అక్కడి నుంచి కదిలి, ఆకాశవాణి భవనం వద్ద ఉన్న బస్సు వైపు వెళ్లారు. అక్కడ అప్పటికే ప్రియాంక గాంధీ ఉన్నారు. ఇద్దరూ పరస్పరం చూసుకున్న అనంతరం బస్సు నుంచి ప్రియాంక దిగారు. అనంతరం ఇద్దరూ కలిసి ఆకాశవాణి భవన్లోకి వెళ్లేందుకు ప్రయత్నించారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఆకాశవాణి సిబ్బంది వారిని అడ్డుకునేందుకు ప్రయత్నించడంతో కొంతసేపు ఉద్రిక్తత నెలకొంది. చివరకు రాహుల్, ప్రియాంక భవన్లోకి ప్రవేశించారు. ఎన్నికల సంఘం కార్యాలయానికి వెనుక వైపు నుంచి చేరుకునేందుకు ఆకాశవాణి భవన్ను మార్గంగా ఉపయోగించాలన్న ఆలోచన రాహుల్కు అక్కడికక్కడే వచ్చిందని కాంగ్రెస్ నేతలు చెప్పినట్లు ఇండియన్ ఎక్స్ప్రెస్ పేర్కొంది. అయితే పోలీసులు వెనుక గేటును మూసివేయడంతో వారు ఆ భవన్ ప్రాంగణంలోనే బైఠాయించారు.
