మావోయిస్టు రాజకీయ ఖైదీల విడుదల, అక్రమ కేసులు ఎత్తివేయాలని డిమాండ్

దేశ వ్యాప్తంగా, తెలంగాణ రాష్ట్రంలోనూ ఎంతో మంది మావోయిస్టులనే ఆరోపణలతో జైళ్ళలో మగ్గుతున్నారని, కొందరు ఏళ్ళ తరబడి విచారణ ఖైదీలుగానే ఉన్నారని సమావేశం ప్రారంభంలో తెలిపారు. ఒకవైపు కేంద్ర, రాష్ట్ర ప్రభుత్వాలు, రాష్ట్రాల డీజీపీలు తెలంగాణ, ఆంధ్రప్రదేశ్, ఛత్తీస్‌గఢ్, ఒడిశా, మహారాష్ట్రాలలో మావోయిస్టు ఉద్యమం ముగిసిపోయిందని ప్రకటించాయి. గత ఎనిమిది నెలల కాలంలో కేంద్ర కమిటీ సభ్యులతో సహా వందలాది మంది మావోయిస్టు కార్యకర్తలు ఉద్యమం వీడి బయటకు రాగా, ప్రభుత్వం వారిని స్వాగతించి ఎటువంటి కేసులు లేకుండా ఇళ్లకు పంపించివేసింది.

అటువంటప్పుడు ఆ మావోయిస్టులకు సహకరించారనే కారణంతో, లేదా ఆ ఉద్యమంలో పని చేశారనే కారణంతో వందలాది సాధారణ కార్యకర్తలను ఇప్పటికీ ప్రభుత్వం జైళ్లలోనే ఉంచటం అన్యాయమని పౌరహక్కుల సంఘం అధ్యక్షులు డాక్టర్ లక్ష్మణ్ అన్నారు. రానున్న ఆగస్టు 15 సందర్భంగా రాజకీయ ఖైదీల విడుదలపై చొరవ చూపాలని ఆయన డిమాండ్ చేశారు. ఈ ఖైదీలలో కొందరు తీవ్ర అనారోగ్య సమస్యలతో బాధపడుతున్నారని, మన రాష్ట్రానికి చెందిన వాళ్ళు ఇతర రాష్ట్రాలలో కూడా అక్రమ కేసులలో మగ్గుతున్నారని తెలిపారు.

మావోయిస్టులనే ఆరోపణలతో తెలంగాణలో సుమారు 50 మంది జైళ్లలో ఉన్నారని, వీరిలో 35 మంది ఆదివాసీలని, హైదరాబాద్ జైళ్లలో 30 మంది, ఖమ్మం జైల్లో 15 మంది ఉన్నారని పేర్కొన్నారు. వీరిలో ఐదుగురు తప్ప మిగిలిన అందరూ ఆదివాసీలే. గత సంవత్సరం కర్రెగుట్టల ప్రాంతంలో కనీసం 15 మంది ఆదివాసీ మహిళలు లొంగిపోయారని ప్రకటించి, వారితో పోలీసు అధికారులు ఫోటోలు దిగి, ఆ తర్వాత వారిపై అక్రమ కేసు పెట్టి జైల్లో పెట్టారని, ఇందులో ఐదుగురు బాలికలు, ఒక బాలుడు మైనర్లేనని న్యూడెమోక్రసీ నాయకులు దామోదర్ తెలిపారు. ఎన్‌ఐఏ కోర్టు ఈ మైనర్లకు కూడా బెయిల్ నిరాకరించిందని, ఆదివాసీలు కావడం వల్ల చాలా మందికి మూలకాత్ పెట్టడానికి కూడా కుటుంబ సభ్యులు ఛత్తీస్‌గఢ్ నుండి రాలేకపోతున్నారని, తెలుగు రాకపోవడం వల్ల అదనపు సమస్యలను ఎదుర్కొంటున్నారని, జైలు అధికారుల చిన్నచూపుకు, ధాష్టీకానికి గురవుతున్నారని ఆయన వివరించారు.

రాజకీయ ఖైదీలను బేషరతుగా విడుదల చేయడానికి ప్రభుత్వం నిర్ణయం తీసుకునేవరకు ఖైదీల విడుదల కోసం జరిగే కార్యక్రమాల్లో పాల్గొంటామని చెప్పారు. దేశ వ్యాప్తంగా వివిధ జైళ్లల్లో మగ్గుతున్న రాజకీయ ఖైదీలలో కొందరు తీవ్ర అనారోగ్య సమస్యలతో బాధపడుతున్నారని, ఉదాహరణకు మూల దేవేందర్ రెడ్డి (60 ఏళ్లకు పైబడిన వాడు)కి దాదాపుగా రెండు కళ్ళు కనిపించడం లేదని, ప్రస్తుతం ఈయన జగ్దల్ పూర్ జైల్లో ఉన్నారని పౌరహక్కుల సంఘం నాయకులు ఎన్. నారాయణరావు తెలిపారు. చంచల్గూడ జైల్లో ఉన్న కర్తమ్ జోగా పక్షవాతంతో బాధపడుతూ కదలలేని స్థితిలో జైలు ఆసుపత్రిలోనే విచారణ ఖైదీగా ఉన్నారని, గంగాధర్ రావు 75 ఏళ్లకు పైబడిన వాడని, నాలుగేళ్లకు పైగా ఎటువంటి విచారణ లేకుండా జైలులో ఉన్నారని, శివారెడ్డి 12 ఏళ్లుగా విచారణ ఖైదీగా ఉన్నారని, పూవర్తి గ్రామానికి చెందిన కా. అడ్మాల్ ఫైళ్లు జిల్లాల పునర్విభజన సమయంలో మిస్ ప్లేస్ చేసినందుకు దొరకక 12 ఏళ్లుగా జైలులో ఉన్నారని, కమల మూడేళ్లుగా, రజిత నాలుగేళ్లుగా చంచల్ గూడ మహిళా జైల్లో ఉన్నారని, మిగిలిన వారందరూ ఏడాదిగా జైల్లో ఉన్నారని, వీరందరి విడుదల గురించి ఆలోచించాల్సిన అవసరం ప్రజాసంఘాల మీద ఉందని ఆయన అన్నారు.

మావోయిస్టు నేత కా. రామచంద్రా రెడ్డి అంత్యక్రియల సందర్భంలో అమిత్ షాను విమర్శించిన నేరానికి భారత్ బచావో నాయకుడు ఇన్నయ్యను ఉపా కింద అక్రమ కేసు బనాయించి జైలు పాలు చేశారని, ఆయన జైలులో ఉన్న కాలంలోనే ఆయన తల్లి, తండ్రి ఇరువురూ మరణించారని, ఆయన కూడా ఎన్నో అనారోగ్య సమస్యలతో బాధపడుతున్నా బెయిలు ఇవ్వడం లేదని సమావేశంలో పాల్గొన్న ఇన్నయ్య కుటుంబసభ్యులు తెలిపారు. మావోయిస్టు నాయకుడు, మహారాష్ట్రకు చెందిన సంజయ్ దీపక్ రావు కూడా గత మూడేళ్లకు పైగా విచారణ ఖైదీగానే చంచల్ గూడ జైల్లో ఉన్నాడని పేర్కొన్నారు.

విశాఖపట్నం జైల్లో 10 మంది, రాజమండ్రి, కాకినాడ, నెల్లూరు తదితర ఆంధ్ర జైళ్లలో 40-50 మంది దాకా ఉన్నారని, ఆంధ్రప్రదేశ్ జైళ్లలో ఉన్న వాళ్ళు కూడా అత్యధికులు ఆదివాసీలేనని తెలిపారు. ఇందులో సాకే కళావతి విశాఖపట్నం జైల్లో ఏడు ఏళ్లుగా ఉందని, ఈమెపై 55 అక్రమ కేసులు మోపారని, కొర్రా నాగేశ్వర రావు పై 40 కేసులు, వంతల రామకృష్ణ పై 45 కేసులు, మర్రి వలస పై 25 కేసులు, కొర్ర సింగ్రు పై 20 కేసులు మోపారని, దేవేంద్ర, శిల్ప మూడేళ్లకు పైబడి జైల్లో ఉన్నారని చెబుతూ, మావోయిస్ట్ రాజకీయాలు ఉన్నాయి అనే నిబంధనతో సంబంధం లేకుండానే ఖైదీల విడుదల కోసం ప్రయత్నించాలని మాస్ లైన్ నాయకులు రామచంద్ర అన్నారు.

తెలుగు రాష్ట్రాలకు చెందిన మరెంతో మంది ఇతర రాష్ట్రాల జైళ్లలో ఉన్నారని, ముఖ్యంగా మధ్యప్రదేశ్ లోని జబల్ పూర్, భోపాల్, సాగర్ జైళ్లలో శిక్షపడిన ఖైదీలుగా ఐదుగురు 17 ఏళ్లుగా జైల్లో ఉన్నారని, వీరందరూ కూడా దాదాపు ఇన్ని ఏళ్లుగా ఎటువంటి మూలకాత్ లు కూడా లేకుండా ఉన్నారని, జీవితకాలపు శిక్ష పడిన అనేక మంది ఇతర ఖైదీలు అవే జైళ్ల నుండి 14 ఏళ్ల ప్రభుత్వం ముందస్తు విడుదలకు నోచుకొని విడుదల అయ్యారని, కానీ వీరిని మాత్రం విడుదల చేయలేదని తెలిపారు. జబల్ పూర్ జైల్లోనే అశోక్ రెడ్డి, ఆయన భార్య కుమారి పొట్టాయి నాలుగేళ్లుగా విచారణ ఖైదీలుగా ఉన్నారని వివరించారు.

జగ్దల్ పూర్ మహిళా జైల్లో 108 ఖైదీలు ఉండగా పద్మ, శిరీష తప్ప మిగిలిన వారందరూ ఆదివాసీలేనని, 2007 నుండి 2017 వరకు జైల్లో గడిపి తీవ్ర అనారోగ్యం పాలైన బెల్లాల పద్మ మళ్ళీ గత మూడేళ్లుగా మళ్ళీ అక్రమ కేసులో జగ్దల్ పూర్ జైల్లో ఉందని, ఆమెతో పాటే శిరీష, దుడ్డు ప్రభాకర్ లు కూడా అదే అక్రమ కేసులో అక్కడి జైల్లోనే ఉన్నారని, వీరికి బెయిల్ రావడం లేదని, విచారణ జరగడం లేదని, వీరిని విడుదల చేసేలా కేంద్ర, రాష్ట్ర ప్రభుత్వాలపై ఒత్తిడి తీసుకురావడం ప్రజాసంఘాల బాధ్యత అని మాస్ లైన్ నాయకులు హన్మేష్ అన్నారు. సర్ పేరుతో పౌరసత్వాన్నే ప్రశ్నిస్తూ కేంద్ర ప్రభుత్వ విధానాలు నడుస్తున్నాయని ఆరోపించారు. రాజకీయ ఖైదీల విడుదల తో పాటు ప్రజాస్వామ్యం కోసం కూడా పోరాడవలసిన అవసరం ఉన్నదన్నారు.

ఒక్క చంచల్ గూడ జైల్లోనే ముప్పై మంది ఆదివాసులు ఉన్నారని న్యాయవాది దశరథ్ తెలిపారు. ఒకవైపు మావోయిస్టు ఉద్యమం ఇక ముగిసిందంటూనే ఎంతో మంది నాయకులపై ఏ కేసులు లేకుండా వదిలేసి, మరొకవైపు అవే కేసులలో ఉన్న సాధారణ కార్యకర్తలను, సానుభూతిపరులను ఇంకా కేసులతో సతాయిస్తూ, కొత్త కేసులు మోపుతూ జైళ్లలోనే నిర్బంధించడం అన్యాయమని అన్నారు. ఈ అన్యాయానికి వ్యతిరేకంగా మాట్లాడి వారి విడుదలకై ప్రభుత్వాన్ని డిమాండ్ చేయవలసిన అవసరం ఉందని, ముఖ్యంగా ప్రస్తుతం మనం తెలంగాణ ప్రభుత్వాన్ని ఈ విషయంలో బలంగా డిమాండ్ చేయడం అవసరమని తెలిపారు. రాజకీయ ఖైదీల విడుదల కమిటీ పేరుతో ఒక ఐక్య వేదిక నిర్మించి, రెండు తెలుగు రాష్ట్రాల్లో రాజకీయ ఖైదీల విడుదల కోసం ఐక్య పోరాటం చేయాలని సమావేశం తీర్మానించింది.