ఖేలో ఇండియా-2026: తెలంగాణ సన్నద్ధం.. 28 క్రీడాంశాల్లో జాతీయ పోటీలు

సమావేశం వివరాలు

తెలంగాణ ఒలింపిక్ అసోసియేషన్ అధ్యక్షుడు, రాష్ట్ర ప్రభుత్వ క్రీడా వ్యవహారాల సలహాదారు, మాజీ ఎంపీ ఎ.పి. జితేందర్ రెడ్డి అధ్యక్షతన జరిగిన ఈ సమావేశంలో వైస్ చైర్మన్, మాజీ కేంద్ర మంత్రి వేణుగోపాలచారి, కమిటీ కన్వీనర్ బండ ప్రకాష్, అసోసియేషన్ ప్రధాన కార్యదర్శి మల్లారెడ్డితో పాటు అడ్వైజరీ కమిటీ సభ్యులు పాల్గొన్నారు. నూతనంగా అడ్వైజరీ సభ్యుడిగా ఎన్నికైన కామారెడ్డి జిల్లాకు చెందిన ప్రముఖ విద్యావేత్త, అథ్లెటిక్స్ అసోసియేషన్ అధ్యక్షుడు డాక్టర్ ఎం. జైపాల్ రెడ్డి కూడా హాజరయ్యారు.

నగరాల్లో క్రీడా పోటీలు

ఈ జాతీయ క్రీడలను హైదరాబాద్తో పాటు హనుమకొండ, నిజామాబాద్, కరీంనగర్, నల్గొండ, ఖమ్మం, మహబూబ్నగర్ నగరాల్లో నిర్వహించాలని నిర్ణయించారు. మొత్తం 28 క్రీడాంశాల్లో జరిగే పోటీలకు దేశవ్యాప్తంగా 7 వేల మందికి పైగా విద్యార్థులు, క్రీడాకారులు, కోచ్లు హాజరుకానున్నారు. వారికి అంతర్జాతీయ ప్రమాణాలతో వసతి, భోజనం, రవాణా సౌకర్యాలు కల్పించాలని కమిటీ సూచించింది.

మంత్రులతో చర్చ

సమావేశం అనంతరం రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్, క్రీడా శాఖ మంత్రి వాకిటి శ్రీహరిని కలిసి క్రీడల నిర్వహణపై సలహాలు, సూచనలు స్వీకరించారు.

కేంద్ర, రాష్ట్ర ప్రభుత్వాల సమన్వయంతో ఈ మెగా క్రీడా సంబరాలను విజయవంతం చేసి జాతీయ స్థాయిలో తెలంగాణకు మంచి గుర్తింపు తీసుకురావాలని జితేందర్ రెడ్డి పిలుపునిచ్చారు. ఈ పోటీలను అద్భుతంగా నిర్వహించి క్రీడాకారులకు మరపురాని అనుభూతిని అందిస్తామని అసోసియేషన్ ప్రతినిధులు ధీమా వ్యక్తం చేశారు.