క్యూ నెట్ కార్యాలయాలపై సీసీఎస్ పోలీసుల దాడులు: పలు నగరాల్లో సోదాలు

బహుళ స్థాయి మార్కెటింగ్ (MLM) పేరుతో వందల కోట్ల రూపాయలు వసూలు చేసినట్లు ఆరోపణలు ఎదుర్కొంటున్న క్యూ నెట్ సంస్థ కార్యాలయాలపై సెంట్రల్ క్రైమ్ స్టేషన్ (CCS) పోలీసులు సోదాలు నిర్వహించారు. హైదరాబాద్, విజయవాడ, విశాఖపట్నం, బెంగళూరు నగరాల్లో ఏకకాలంలో ఈ దాడులు జరిగాయి.

హైదరాబాద్‌లోని ఆరు ప్రాంతాల్లో తెల్లవారుజాము నుంచే పోలీసులు విస్తృతంగా తనిఖీలు చేపట్టారు. క్యూ నెట్ కార్యకలాపాలకు సంబంధించిన కీలక సమాచారాన్ని సేకరించేందుకు అధికారులు ప్రయత్నిస్తున్నారు. ఈ దాడుల నేపథ్యంలో సంస్థ కార్యకలాపాలు స్తంభించిపోయాయి.

పోలీసులు ఈ కేసులో ఇప్పటివరకు 20 మంది నిందితులను గుర్తించినట్లు తెలిసింది. వీరిలో సంస్థ నిర్వాహకులు, కీలక భాగస్వాములు ఉన్నట్లు భావిస్తున్నారు. అక్రమంగా వసూలు చేసిన నిధులపై పోలీసులు ఆరా తీస్తున్నారు.