ఉత్తరాఖండ్లో అసాధారణ ధైర్యసాహసాలు ప్రదర్శించిన ఆరుగురు చిన్నారులకు కేంద్ర హోంమంత్రి అమిత్ షా, ముఖ్యమంత్రి పుష్కర్ సింగ్ ధామి రాష్ట్ర బాలల వీరత్వ పురస్కారాలను అందజేశారు. శుక్రవారం డెహ్రాడూన్లోని పరేడ్ గ్రౌండ్లో జరిగిన కార్యక్రమంలో చిన్నారులకు పతకాలు, ప్రశంసాపత్రాలు, రూ.51 వేల నగదు బహుమతిని అందించారు.
మహిళా సాధికారత, శిశు సంక్షేమ శాఖ ఆధ్వర్యంలో 2026-27 ఆర్థిక సంవత్సరానికి తొలిసారిగా ఈ పురస్కారాలను అందించారు. వివిధ ప్రమాదకర పరిస్థితుల్లో ధైర్యం, సమయస్ఫూర్తి, మానవత్వాన్ని ప్రదర్శించిన చిన్నారులను ప్రభుత్వం గుర్తించి గౌరవించింది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
చమోలీ జిల్లాకు చెందిన దివ్య, దీపిక, ఆరవ్ సింగ్లు ఎలుగుబంటి దాడి సమయంలో చూపిన ధైర్యానికి పురస్కారానికి ఎంపికయ్యారు. 2022లో హరిశంకర్ పాఠశాల ప్రాంగణంలోకి ప్రవేశించిన ఎలుగుబంటి ఆరో తరగతి విద్యార్థి ఆరవ్పై దాడి చేసింది. ఆ సమయంలో ఎనిమిదో తరగతి విద్యార్థిని దివ్య ఎలుగుబంటిని వెంబడిస్తూ ఆరవ్ను రక్షించేందుకు ప్రయత్నించింది. మరో విద్యార్థిని దీపిక వెంటనే తొమ్మిది మంది విద్యార్థులను తరగతి గదిలోకి తీసుకెళ్లి సురక్షితంగా కాపాడింది.
