మధ్యప్రదేశ్లోని ఉజ్జయినిలో 2028లో జరగనున్న సింహస్థ కుంభమేళా ఏర్పాట్లపై ముఖ్యమంత్రి మోహన్ యాదవ్ సోమవారం ఉన్నత స్థాయి సమీక్ష నిర్వహించారు. నగరంలోని పరిపాలనా సముదాయంలో జరిగిన ఈ సమావేశంలో అభివృద్ధి పనుల పురోగతిని పరిశీలించి, అధికారులకు పలు కీలక సూచనలు చేశారు. భక్తులకు మెరుగైన సౌకర్యాలు, రవాణా సదుపాయాలు కల్పించడంపై దృష్టి సారించాలని ఆదేశించారు.
సింహస్థ కుంభమేళాకు దేశం నలుమూలల నుంచి లక్షలాది మంది భక్తులు తరలివచ్చే అవకాశం ఉన్నందున, ముందస్తు ప్రణాళికతో ఏర్పాట్లు చేయాలని ముఖ్యమంత్రి సూచించారు. భక్తుల రాకపోకలకు ఎటువంటి ఇబ్బందులు కలగకుండా రహదారులు, రవాణా మార్గాలు, ఇతర మౌలిక సదుపాయాల అభివృద్ధిని వేగవంతం చేయాలని అధికారులకు దిశానిర్దేశం చేశారు. వివిధ శాఖలు సమన్వయంతో పనిచేస్తూ పనుల పురోగతిని ఎప్పటికప్పుడు సమీక్షించాలని సూచించారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
రహదారులు, ఘాట్ల అభివృద్ధి
సింహస్థ 2028ను దృష్టిలో ఉంచుకుని ఉజ్జయినిలో పలు మౌలిక సదుపాయాల ప్రాజెక్టులు చేపడుతున్నారు. ఇందులో భాగంగా రహదారుల విస్తరణ, వంతెనలు, సొరంగ మార్గాలు, షిప్రా నది తీరంలోని ఘాట్ల అభివృద్ధి వంటి పనులు కొనసాగుతున్నాయి. గతంలో ముఖ్యమంత్రి మోహన్ యాదవ్, కేంద్ర పట్టణాభివృద్ధి శాఖ మంత్రి మనోహర్ లాల్ ఖట్టర్ కూడా ఈ పనుల పురోగతిని సమీక్షించి, నాణ్యతతో పాటు గడువుల పాటింపునకు ప్రాధాన్యం ఇవ్వాలని సూచించారు.
