భారత స్క్వాష్ ఆటగాడు వేలవన్ సెంథిల్కుమార్ చెక్ ఓపెన్ 2026 టైటిల్ను గెలుచుకున్నాడు. చెక్ రిపబ్లిక్లోని బ్ర్నోలో జరిగిన ఫైనల్లో స్కాట్లాండ్కు చెందిన టాప్ సీడ్ గ్రెగ్ లోబన్ను 13-11, 11-5, 8-11, 11-7 స్కోరుతో ఓడించాడు. ఈ విజయంతో తన కెరీర్లో 12వ టూర్ టైటిల్ను, రెండో కాపర్ స్థాయి టైటిల్ను సాధించాడు.
అంతర్జాతీయ స్క్వాష్లో భారత ఆటగాడు వేలవన్ సెంథిల్కుమార్ మరోసారి సత్తా చాటాడు. చెక్ రిపబ్లిక్లోని బ్ర్నోలో జరిగిన 35,000 అమెరికన్ డాలర్ల ప్రైజ్మనీ కలిగిన చెక్ ఓపెన్ 2026 టోర్నమెంట్లో పురుషుల సింగిల్స్ టైటిల్ను కైవసం చేసుకున్నాడు. జరిగిన ఫైనల్లో టోర్నమెంట్ టాప్ సీడ్, ప్రపంచ 31వ ర్యాంకర్ గ్రెగ్ లోబన్ను నాలుగు గేముల్లో ఓడించి విజేతగా నిలిచాడు. ప్రపంచ ర్యాంకింగ్స్లో 42వ స్థానంలో ఉన్న సెంథిల్కుమార్ ఈ టోర్నీలో నాలుగో సీడ్గా బరిలోకి దిగాడు. ఫైనల్లో తొలి గేమ్ హోరాహోరీగా సాగింది. కీలక సమయంలో ఒత్తిడిని అధిగమించి 13-11తో తొలి గేమ్ను గెలుచుకున్నాడు. అనంతరం రెండో గేమ్ను 11-5తో సొంతం చేసుకుని ఆధిక్యంలోకి వెళ్లాడు. అయితే మూడో గేమ్లో లోబన్ పుంజుకుని 11-8తో విజయం సాధించాడు. దీంతో మ్యాచ్లో ఉత్కంఠ నెలకొంది. కానీ నాలుగో గేమ్లో సెంథిల్కుమార్ మళ్లీ తన ఆటతీరును మెరుగుపరుచుకుని 11-7తో గేమ్ను గెలిచాడు. ఫలితంగా 13-11, 11-5, 8-11, 11-7తో మ్యాచ్ను ముగించి టైటిల్ను అందుకున్నాడు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఈ విజయంతో సెంథిల్కుమార్ ఖాతాలో 12వ టూర్ టైటిల్ చేరింది. అంతేకాకుండా కాపర్ స్థాయిలో ఇది అతనికి రెండో టైటిల్. అంతకుముందు ఆగస్టులో జరిగిన బుడాపెస్ట్ ఓపెన్లోనూ విజేతగా నిలిచి ఈ స్థాయి తొలి టైటిల్ను సాధించాడు. చెక్ ఓపెన్లో సెంథిల్కుమార్ తన ప్రయాణాన్ని రెండో రౌండ్ నుంచి ప్రారంభించాడు. తొలి రౌండ్లో బై లభించడంతో నేరుగా రెండో రౌండ్లో బ్రెజిల్ ఆటగాడు డియాగో గొబ్బిని 11-4, 11-7, 11-2తో ఓడించాడు. క్వార్టర్ ఫైనల్లో అర్జెంటీనాకు చెందిన ఎనిమిదో సీడ్ జెరెమియాస్ అజానాను 11-3, 11-8, 11-7తో చిత్తు చేశాడు. సెమీఫైనల్లో రెండో సీడ్, ఫ్రాన్స్కు చెందిన ప్రపంచ 32వ ర్యాంకర్ ఆగస్టే డుసోర్డ్పై 11-7, 12-10, 11-1తో వరుస గేముల్లో విజయం సాధించి ఫైనల్కు చేరుకున్నాడు.
