ఆంధ్రప్రదేశ్ రైల్వే ప్రయాణికులకు శుభవార్త. రాష్ట్రం మీదుగా తొలిసారిగా వందే భారత్ స్లీపర్ ఎక్స్ప్రెస్ రైలు నడవనుంది. బెంగళూరుముంబయి మధ్య నడిచే ఈ రైలుకు అనంతపురం, గుంతకల్లు స్టేషన్లలో నిలుపుదల కల్పించారు. దీంతో రాయలసీమ ప్రాంత ప్రయాణికులకు ప్రయోజనం చేకూరనుంది.
రైల్వే శాఖ ఇప్పటికే బెంగళూరు నగరంలోని కేఎస్ఆర్ బెంగళూరు నుంచి ముంబయిలోని ఛత్రపతి శివాజీ మహారాజ్ టెర్మినస్ వరకు వందే భారత్ స్లీపర్ సేవను ప్రవేశపెట్టేందుకు ఆమోదం తెలిపింది. ఈ రైలును ఈ నెలలోనే ప్రారంభించే అవకాశం ఉందని సమాచారం. వారానికి ఆరు రోజులు రైలు నడిపే ప్రతిపాదన ఉన్నట్లు రైల్వే వర్గాలు తెలిపాయి.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ప్రతిపాదిత షెడ్యూల్ ప్రకారం, ముంబయి నుంచి రాత్రి 10.30 గంటలకు బయలుదేరే రైలు మరుసటి రోజు మధ్యాహ్నం 2.50 గంటలకు బెంగళూరుకు చేరుకోనుంది. బెంగళూరు నుంచి రాత్రి 10 గంటలకు బయలుదేరి మరుసటి రోజు మధ్యాహ్నం 1.50 గంటలకు ముంబయి చేరుకునేలా షెడ్యూల్ రూపొందించారు. మొత్తం ప్రయాణ సమయం సుమారు 16 గంటలు ఉండనుంది.
