అధిక లాభాలు వస్తాయని ఆశ చూపించి ఆన్లైన్ పెట్టుబడుల పేరుతో మోసం చేసిన ఘటన గుజరాత్లోని వడోదరలో వెలుగుచూసింది. ఫతేగంజ్ ప్రాంతానికి చెందిన ఓ వ్యాపారిని సైబర్ నేరగాళ్లు వాట్సాప్ గ్రూపులో చేర్చి, షేర్ మార్కెట్లో పెట్టుబడులు పెడితే రోజుకు 5 నుంచి 20 శాతం వరకు రాబడి వస్తుందని నమ్మించారు. ఈ క్రమంలో బాధితుడి నుంచి సుమారు రూ.1.95 కోట్లను వివిధ దఫాల్లో మోసపూరితంగా తీసుకున్నారు.
బాధితుడిని హెచ్డీఎఫ్సీ సెక్యూరిటీస్ ది గేట్ ఆఫ్ వెల్త్ పేరుతో ఉన్న వాట్సాప్ గ్రూపులో చేర్చినట్లు సమాచారం. గ్రూపులో నిషా వర్మ అనే వ్యక్తి షేర్ మార్కెట్ ట్రేడింగ్కు సంబంధించిన సూచనలు ఇస్తున్నట్లు నటించింది. అనంతరం ఉమేశ్ శర్మ అనే వ్యక్తి మరో గ్రూపులోకి చేర్చి, డీఎంఏ ట్రేడింగ్ ఖాతా తెరవాలని సూచించినట్లు ఫిర్యాదులో పేర్కొన్నారు. ఆ తర్వాత పెట్టుబడుల కోసం ఒక లింక్ పంపించి, దాని ద్వారా వివరాలు నమోదు చేయించారు. బాధితుడి పేరుతో ఆన్లైన్ ఖాతా కూడా తెరిచారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
తాము సెబీలో నమోదైన సంస్థకు చెందినవారమని నమ్మించేందుకు నకిలీ ధ్రువపత్రాలను పంపినట్లు పోలీసులు తెలిపారు. ఆ పత్రాలను చూసిన బాధితుడు ఆ సంస్థపై నమ్మకం పెట్టుకుని పెట్టుబడులు పెట్టినట్లు సమాచారం. సుమారు రెండున్నర నెలల వ్యవధిలో వ్యాపారి ఆన్లైన్ ఖాతాలో మొత్తం రూ.1.95 కోట్ల వరకు జమ చేసినట్లు పోలీసులు తెలిపారు. అయితే అతనికి తిరిగి వచ్చిన మొత్తం కేవలం రూ.2.32 లక్షలేనని వెల్లడైంది. మరోవైపు ఆన్లైన్ ఖాతాలో రూ.6.16 కోట్ల వరకు నిల్వ ఉన్నట్లు చూపించినప్పటికీ, ఆ మొత్తాన్ని ఉపసంహరించుకునే అవకాశం ఇవ్వలేదు. దీంతో బాధితుడికి అనుమానం వచ్చింది.
