రాయచోటి అభివృద్ధికి రూ.35 కోట్ల హెచ్ఏఎం పనులకు శ్రీకారం: మంత్రి మండిపల్లి

స్థానిక అజయ్ ఫంక్షన్ హాల్లో మున్సిపల్ శాఖ ఆధ్వర్యంలో నిర్వహించిన ఈ కార్యక్రమంలో రాష్ట్ర రవాణా, యువజన, క్రీడల శాఖ మంత్రి మండిపల్లి రాంప్రసాద్ రెడ్డి, ఆయన సోదరుడు మండిపల్లి లక్ష్మీ ప్రసాద్ రెడ్డి, మున్సిపల్ ప్రజా ప్రతినిధులు, టీడీపీ నాయకులు, కార్యకర్తలు పాల్గొన్నారు.

రాయచోటి అభివృద్ధికి రూ.244.32 కోట్లు

ఈ సందర్భంగా వర్చువల్ కార్యక్రమం అనంతరం మండిపల్లి లక్ష్మీ ప్రసాద్ రెడ్డి మాట్లాడుతూ... రాయచోటి పట్టణాన్ని అన్ని రంగాల్లో అభివృద్ధి చేసేందుకు రాష్ట్ర ప్రభుత్వం పెద్ద ఎత్తున నిధులు కేటాయిస్తోందని అన్నారు. ఈ మేరకు రాయచోటి మున్సిపాలిటీ పరిధిలో సుమారు రూ.35 కోట్ల అంచనా వ్యయంతో చేపట్టనున్న వివిధ అభివృద్ధి పనులకు ముఖ్యమంత్రి వర్చువల్గా శంకుస్థాపన చేసి, పనులకు శ్రీకారం చుట్టడం శుభపరిణామమని అన్నారు. పట్టణ ప్రజలకు మెరుగైన, సురక్షితమైన మౌలిక వసతులు కల్పించాలన్న లక్ష్యంతో మంత్రి మండిపల్లి రాంప్రసాద్ రెడ్డి ప్రత్యేక శ్రద్ధతో కృషి చేస్తున్నారని తెలిపారు.

మంత్రి విజ్ఞప్తి మేరకు పురపాలక పరిపాలన, పట్టణాభివృద్ధి శాఖ ద్వారా వివిధ పథకాల కింద మొత్తం రూ.244.32 కోట్ల విలువైన పనులకు నిధులు కేటాయించినట్లు వెల్లడించారు.

ప్రజల అవసరాలకు అనుగుణంగా సురక్షితమైన తాగునీటి సరఫరా, నీటి వనరుల పునరుద్ధరణ, మెరుగైన డ్రైనేజీ వ్యవస్థ, ఘనద్రవ వ్యర్థాల నిర్వహణ, నాణ్యమైన రహదారులు, డివైడర్లు, పార్కులు, వీధి దీపాలు తదితర మౌలిక వసతులను అభివృద్ధి చేయనున్నట్లు పేర్కొన్నారు.

అత్యంత ప్రాధాన్యత కలిగిన - పథకం కింద రాయచోటి పట్టణంలో తాగునీటి సరఫరా, డ్రైనేజీ వ్యవస్థల అభివృద్ధికి ప్రభుత్వం రూ.197 కోట్లు కేటాయించిందని తెలిపారు. ఈ పనులు ప్రస్తుతం పాలనా అనుమతుల దశలో ఉన్నాయని తెలిపారు.

అమృత్ 2.0 పథకం కింద రాయచోటి పట్టణంలో తాగునీటి సరఫరా, నీటి వనరుల పునరుద్ధరణకు రూ.3.68 కోట్లు కేటాయించామని, మంత్రి ఆదేశాలతో పనులు వేగంగా కొనసాగుతున్నాయని తెలిపారు.

అదేవిధంగా స్వచ్ఛ భారత్ మిషన్ () 2.0 కింద ఘన, ద్రవ వ్యర్థాల సమర్థవంతమైన నిర్వహణ కోసం రూ.4.96 కోట్లతో పనులు చేపడుతున్నట్లు వివరించారు.

రాబోయే రోజుల్లో రాయచోటి పట్టణంలో మరింత మెరుగైన రహదారులు, పారిశుధ్యం, తాగునీరు, డ్రైనేజీ, పార్కులు, వీధి దీపాలు తదితర సౌకర్యాలు అందుబాటులోకి రానున్నాయని ఆయన తెలిపారు.