నా భూమి నా హక్కు.. అయినా అన్యాయమే: దళితుల ఆవేదన

సర్వే నంబర్ 50/1/2 లో ఉన్న తమ భూమి కేవలం మట్టి ముక్క కాదని, అది తమ జీవనాధారమని బాధితులు తెలిపారు. అలాంటి తమ భూమిలోకి చొరబడి, దొంగతనంగా మొరం తవ్వుకుంటూ, తాము పెంచుకున్న చెట్లను నరికివేస్తూ, మొక్కలను ధ్వంసం చేస్తూ తమ శ్రమను, ఆశలను బుగ్గిపాలు చేస్తున్నారని ఆరోపించారు. అన్ని చట్టపరమైన పత్రాలు తమ దగ్గర ఉన్నా, ఈ అన్యాయాన్ని ఎందుకు భరించాలని వారు ప్రశ్నించారు.

కుల వివక్షపై ఆవేదన

ఈ అన్యాయానికి కారణం తమ కులమేనని బాధితులు ఆవేదన వ్యక్తం చేశారు. చిన్న కులం వాడిని ఎలా అణచివేయాలి, ఎలా ఇబ్బందులకు గురిచేయాలి అనేది కొందరికి వెన్నతో పెట్టిన విద్యగా మారిందని, డబ్బు ఉన్నవారికి ఒక లెక్క, లేనివారికి మరో లెక్క ఫతేపూర్ గ్రామంలో నేటికీ మారలేదని తెలిపారు. ఇది కేవలం తమపై జరుగుతున్న దాడి కాదని, భారత రాజ్యాంగానికి విరుద్ధమైన చర్య అని వారు పేర్కొన్నారు. రాజ్యాంగం అందరికీ సమాన హక్కులు కల్పిస్తే, కొందరు వ్యక్తులు తమ కుల అహంకారంతో దాన్ని తుంగలో తొక్కుతున్నారని విమర్శించారు.

అధికారులకు విజ్ఞప్తి

అన్ని ఆధారాలు, పత్రాలు చేతిలో పట్టుకుని న్యాయం కోసం తలుపులు తడుతుంటే గుండె తరుక్కుపోతోందని, దళితుడిగా ఈ సమాజం ఇంకా ఎంతకాలం ఇలాంటి వివక్షకు గురవుతుందని బాధితులు ఆవేదన వ్యక్తం చేశారు. తమకు కావలసింది కేవలం భూమి మాత్రమే కాదని, ఒక మనిషిగా తమ హక్కు, ఆత్మగౌరవం అని స్పష్టం చేశారు. ఈ అన్యాయంపై అధికారులు తక్షణమే స్పందించి, తమ భూమిని ఆన్లైన్ చేసి, తమకు, తమ కుటుంబానికి రక్షణ కల్పించాలని విజ్ఞప్తి చేశారు. రాజ్యాంగానికి విలువ లేకుండా పోయిందని, ఇది ఒక దళితుడి ఆవేదన అని వారు తెలిపారు.