అక్రమ టపాసుల విక్రయాలపై కఠిన చర్యలు: ఎస్పీ నచికేత విశ్వనాథ్

ప్రమాదాలకు తావులేకుండా, సరైన భద్రతా ప్రమాణాలు పాటిస్తూ విక్రయించాలని విక్రయదారులకు జిల్లా ఎస్పీ పలు సూచనలు చేశారు. షాపులకు, షాపులకు మధ్య నిర్దేశించిన దూరం తప్పనిసరిగా పాటించాలని, ప్రతి టపాసుల విక్రయ షాపులోనూ నీరు, ఇసుక, అగ్నిమాపక యంత్రాలు ( ) తప్పనిసరిగా సిద్ధంగా ఉంచుకోవాలని సూచించారు.

చిన్న పిల్లలను విక్రయాల పనుల్లో ఉంచుకోరాదని, పోలీసు నియమ నిబంధనలకు విరుద్ధంగా ఎవరైనా ప్రవర్తిస్తే వారిపై చట్ట ప్రకారం చర్యలు తీసుకుంటామని, అటువంటి వారిపై ప్రత్యేక నిఘా ఏర్పాటు చేశామని ఎస్పీ తెలిపారు. దీపావళి పర్వదినం రోజున జిల్లా ప్రజలు ఆనందంగా పండుగ జరుపుకోవాలని, టపాసులు కాల్చే సమయంలో జాగ్రత్తలు తీసుకోవాలని సూచించారు.

ముఖ్యంగా చిన్నపిల్లల పట్ల తగిన జాగ్రత్తలు తీసుకోవాలని సూచించారు. సురక్షితంగా పండుగ జరుపుకునేందుకు చేయాల్సిన, చేయకూడని అంశాలను ఎస్పీ వివరించారు. చిన్నారులు తల్లితండ్రుల పర్యవేక్షణలోనే బాణాసంచా కాల్చాలి. బాణాసంచా కాల్చేటప్పుడు కాటన్ దుస్తులు ధరించాలి. రోడ్డు వెంబడి వెళ్లే వాహనాలకు, ప్రజలకు ఇబ్బంది కలగకుండా టపాసులు కాల్చుకోవాలి. ముందుజాగ్రత్తగా బకెట్లలో నీరు అందుబాటులో ఉంచుకొని జాగ్రత్త వహించాలి.

లైసెన్స్ ఉన్న దుకాణంలోనే బాణాసంచా కొనుగోలు చేయాలి. బాణాసంచా ప్యాకెట్ పై ముద్రించిన తయారీ తేదీ, ప్యాకెట్ పై తయారీదారు సూచించిన జాగ్రత్తలను పాటించాలి. పెద్దలు టపాసులు కాల్చేటప్పుడు పిల్లలను దూరంగా ఉంచాలి. ప్రథమ చికిత్సకు అవసరమైన మందులు అందుబాటులో ఉంచుకోవాలి. అనుకోని ప్రమాదం జరిగి గాయాలైతే తక్షణం సమీపంలోని ఆస్పత్రికి తరలించాలి.

ఇంటిలోపల బాణాసంచా కాల్చకూడదు. సగం కాలిన టపాసులను మళ్ళీ వెలిగించే ప్రయత్నం చేయడం, ముట్టుకోవడం ప్రమాదకరం. దయచేసి అలా చేయవద్దు. గాజు సీసాలు, ఇనుప రేకులతో కూడిన డబ్బాలలో బాణసంచా కాల్చడం చాలా ప్రమాదకరం. దయచేసి అలా కాల్చవద్దు. ఆస్పత్రుల వద్ద బాణాసంచా కాల్చరాదని జిల్లా ఎస్పీ శ్రీ షెల్కే నచికేత్ విశ్వనాథ్ ఐపీఎస్ ప్రజలకు సూచించారు.

ఎక్కడైనా ప్రమాదం చోటు చేసుకున్నా, అక్రమంగా టపాసులు విక్రయిస్తున్నా వెంటనే డయల్ 112 కు గాని, సంబంధిత పోలీసు స్టేషన్ కు గాని సమాచారం అందించాలని, సమాచారం చేరవేసిన వారి వివరాలు గోప్యంగా ఉంచుతామని జిల్లా ఎస్పీ షెల్కే నచికేత్ విశ్వనాథ్ ఐపీఎస్ తెలిపారు.