ఏనుగుల తరలింపులో తొందరపాటుపై సుప్రీంకోర్టు ఆందోళన

అయితే ప్రస్తుత కేసులో, ఏనుగుల తరలింపు కోసం దరఖాస్తు నాటికే ఏనుగు చెన్నైకి చేరుకుందని కోర్టు దృష్టికి తీసుకొచ్చారు. దాదాపు 3,000 కిలోమీటర్ల ప్రయాణాన్ని కేవలం తొమ్మిది రోజుల్లో పూర్తి చేయడం, చట్టపరమైన అన్ని అనుమతులు, తనిఖీలను ఆ సమయంలో పూర్తి చేయడం సాధ్యమేనా అని ప్రశ్నించారు.

తరలింపునకు హైకోర్టు ఆదేశించలేదు

ఈ వ్యవహారంలో పెండింగ్లో ఉన్న దరఖాస్తును పరిశీలించి నిర్ణయం తీసుకోవాలని మాత్రమే హైకోర్టు ఆదేశించిందని న్యాయవాది తెలిపారు. నిర్దిష్ట గడువులోగా ఏనుగును తరలించాలని హైకోర్టు ఎలాంటి ఆదేశాలు ఇవ్వలేదని పేర్కొన్నారు. అయినప్పటికీ అధికారులు వేగంగా అనుమతులు మంజూరు చేయడంపై అభ్యంతరం వ్యక్తం చేశారు.

ఏనుగులను వెనక్కి పంపలేమన్న సుప్రీంకోర్టు

అయితే అప్పటికే సంబంధిత ఏనుగులన్నీ ఇతర ప్రాంతాలకు తరలిపోయాయని సుప్రీంకోర్టు ధర్మాసనం పేర్కొంది. ఈ దశలో వాటిని తిరిగి వెనక్కి పంపాలని ఆదేశించలేమని అభిప్రాయపడింది. ఒకవేళ ఏనుగుల తరలింపులో తొందరపాటు జరుగుతోందని ముందుగానే తమ దృష్టికి వచ్చి ఉంటే తప్పకుండా జోక్యం చేసుకునేవారమని ప్రధాన న్యాయమూర్తి జస్టిస్ సూర్యకాంత్ వ్యాఖ్యానించారు.

బందీ ఏనుగుల గుర్తింపు, యాజమాన్య వివరాల పరిశీలన, రవాణా విధానం, వాటికి అందించే సంరక్షణ విషయంలో గతంలోనూ సుప్రీంకోర్టు పలు ఆదేశాలు జారీ చేసిందని ధర్మాసనం గుర్తుచేసింది. అడవి ఏనుగులను పట్టుకోవడంపై కూడా గతంలో ఆంక్షలు విధించినట్లు పేర్కొంది. ఈ సమస్యపై 2021 నుంచి న్యాయస్థానం దృష్టి సారిస్తోందని తెలిపింది.

చివరగా, పిటిషనర్ తరఫు న్యాయవాది ప్రస్తుత పిటిషన్ను ఉపసంహరించుకునేందుకు అనుమతి కోరారు. కొనసాగుతున్న ఇతర న్యాయ ప్రక్రియలో తగిన దరఖాస్తు చేసుకునే స్వేచ్ఛ ఇవ్వాలని విజ్ఞప్తి చేశారు. అందుకు సుప్రీంకోర్టు అనుమతించింది.

భారతదేశంలో బందీ ఏనుగులను ఒక రాష్ట్రం నుంచి మరో రాష్ట్రానికి తరలించే ప్రక్రియలో నిబంధనలను పాటించకుండా తీసుకున్న తొందరపాటు నిర్ణయాలపై సుప్రీంకోర్టు తీవ్ర ఆందోళన వ్యక్తం చేసింది. దాదాపు 3,000 కిలోమీటర్ల దూరాన్ని కేవలం తొమ్మిది రోజుల్లో పూర్తి చేయడంపై ధర్మాసనం ప్రశ్నలు లేవనెత్తింది. పర్యావరణ చట్టాల ప్రకారం ఈ ప్రక్రియకు కనీసం 50 రోజులు పట్టాలని న్యాయవాది తెలిపారు.

ఏనుగుల తరలింపునకు ఎంత సమయం పడుతుంది?

పర్యావరణ చట్టాల ప్రకారం, బందీ ఏనుగులను ఒక రాష్ట్రం నుంచి మరో రాష్ట్రానికి తరలించాలంటే పలు దశల్లో తనిఖీలు, అనుమతులు, అధికారుల సంప్రదింపులు అవసరమని, ఈ ప్రక్రియ సాధారణంగా కనీసం 50 రోజుల సమయం తీసుకుంటుందని న్యాయవాదులు తెలిపారు.