కామారెడ్డిలో రాఖీతో రోడ్డు భద్రత సందేశం.. హెల్మెట్ లేనివారికి ట్రాఫిక్ పోలీసుల అవగాహన

కామారెడ్డి డీఎస్పీ ఆదేశాల మేరకు పట్టణ సీఐ నరహరి ఆధ్వర్యంలో ట్రాఫిక్ ఎస్ఐ చంద్రశేఖర్ గౌడ్, మహిళా ట్రాఫిక్ సిబ్బంది పోలీస్ స్టేషన్ ఎదుట వాహనదారులకు రాఖీ శుభాకాంక్షలు తెలిపారు. హెల్మెట్ లేకుండా వచ్చిన వారికి బొట్టు పెట్టి రాఖీ కట్టి, మీ భద్రత కోసం తప్పనిసరిగా హెల్మెట్ ధరించి వాహనం నడపాలి అని సూచించారు.

జరిమానాల కంటే అవగాహన ద్వారా ప్రజల్లో బాధ్యత పెంపొందించాలనే లక్ష్యంతో చేపట్టిన ఈ కార్యక్రమం వాహనదారులను ఆకట్టుకుంది. రోడ్డు ప్రమాదాలను నివారించడంలో హెల్మెట్ కీలక పాత్ర పోషిస్తుందని, ప్రతి ద్విచక్ర వాహనదారుడు తప్పనిసరిగా హెల్మెట్ ధరించాలని పోలీసులు విజ్ఞప్తి చేశారు.

ఈ కార్యక్రమంలో ఎస్ఐ వినయ్ సాగర్తో పాటు మహిళా ట్రాఫిక్ సిబ్బంది శోభ, స్వప్న, అనిత, మూసిన్ ఖాన్, తిరుపతి, చంద్రబాబు తదితరులు పాల్గొన్నారు. వాహనదారులు కృతజ్ఞతలు తెలిపారు.