కామారెడ్డిలో వినూత్న ట్రాఫిక్ అవగాహన: ఇందిరాచౌక్ బూత్లో ట్రాఫిక్ వినాయకుడు

వినాయకుడిని దర్శించుకునే భక్తులకు భక్తి భావంతోనే ట్రాఫిక్ నియమాలపై అవగాహన కల్పించడమే ఈ కార్యక్రమం ప్రధాన ఉద్దేశమని పోలీసులు తెలిపారు. హెల్మెట్ ధరించడం, ట్రిపుల్ రైడింగ్కు దూరంగా ఉండటం, మద్యం సేవించి వాహనం నడపకపోవడం, వేగ పరిమితులు పాటించడం, ట్రాఫిక్ సిగ్నల్స్ను గౌరవించడం వంటి అంశాలపై ప్రజలకు సందేశాలు అందిస్తున్నారు.

ట్రాఫిక్ బూత్ పరిసరాల్లో రోడ్డు భద్రత, సీసీ కెమెరాల వినియోగం, డ్రంక్ అండ్ డ్రైవ్ నివారణ తదితర అంశాలపై అవగాహన బోర్డులను ఏర్పాటు చేశారు. చలాన్ల కంటే చైతన్యం ముఖ్యం అనే భావనతో కేవలం జరిమానాలు విధించడమే కాకుండా ప్రజల ఆలోచనా విధానంలో మార్పు తీసుకురావడమే లక్ష్యంగా ఈ కార్యక్రమాన్ని చేపట్టినట్లు పోలీసులు పేర్కొన్నారు.

దేవుడే ట్రాఫిక్ నియమాలు పాటించమని చెబుతున్నప్పుడు మనం ఎందుకు పాటించకూడదు అనే ఆలోచన ప్రజల్లో కలిగించడం ద్వారా రోడ్డు ప్రమాదాల నివారణకు కృషి చేస్తున్నారు. భక్తి ద్వారా అవగాహన, అవగాహన ద్వారా మార్పు, మార్పు ద్వారా ప్రమాదాల నివారణే ట్రాఫిక్ వినాయకుడి ప్రధాన సందేశమని పోలీసులు తెలిపారు.